कोरोना संक्रमणका कारण विश्वमा ज्यान गुमाउनेको संख्या १८४,२०४ पुग्यो, २६ लाख ३७ हजार भन्दा बढी संक्रमित (अपडेट)

काठमाडौं, ११ बैशाख । चीनको वुहानबाट फैलिएको कोभिड-१९ नाम दिइएको प्राणघातक कोरोना भाइरसको संक्रमणबाट विश्वमा ज्यान गुमाउनेको संख्या १ लाख ८४ हजार २०४ पुगेको छ ।

वल्र्डोमिटर्स इन्फो डटको ताजा अपडेट अनुसार अहिलेसम्म कोरोना संक्रमितको संख्या २६ लाख ३७ हजार भन्दा बढी पुगिसकेको छ, भने ७ लाख १७ हजार ६ सय २५ निको भइसकेका छन् ।

यसैबीच, ९ लाख १ हजार ८२९ वटा कोरोनाका केसहरु बन्द भइसकेका छन्, भने १७ लाख ३५ हजार ५८५ वटा केसहरु एक्टिभ छन् ।

यो समाचार तयार गर्दासम्म संयुक्त राज्य अमेरिकामा कोरोना संक्रमणका कारण सबै भन्दा बढी ४७ हजार ६ सय ६३ ले ज्यान गुमाइसकेका छन्, भने संक्रमितको संख्या ८ लाख ४८ हजार ७३५ पुगेको छ । जसमध्ये ८४ हजार ०५० जना निको भइसकेका छन् ।

यसैबीच, इटालीमा ज्यान गुमाउनेको संख्या २५ हजार ८५ पुगिसकेको छ, भने संक्रमितको संख्या १ लाख ८७ हजार ३२७ पुगेको छ । यसैबीच निको हुनेको संख्या ५४ हजार ५४३ पुगेको छ ।

कोरोना संक्रमणका कारण यता स्पेनमा पनि २१ हजार ७ सय १७ को ज्यान गइसकेको छ, भने संक्रमितको संख्या २ लाख ८ हजार ३८९ पुगिसकेको छ । निको भएर फर्कनेहरुको संख्या ८५ हजार ९ सय १५ पुगेको छ ।

फ्रान्समा १ लाख ५९ हजार ८७७ जना कुल सङ्क्रमित भएका छन् भने, २१ हजार ३ सय ४० को ज्यान गएको छ । यसैबीच ४० हजार ६५७ निको भएर फर्किइएका छन् ।

यूकेमा पनि ज्यान गुमाउनेको संख्या १८ हजार १ सय पुगेको छ, भने १ लाख ३३ हजार ४ सय ९५ जना संक्रमित छन् ।

त्यस्तै इरान, बेल्जियम, जर्मनीमा, चीन, टर्की, नेदरल्याण्डस्, ब्राजिल, स्वीट्जरल्यनण्डलगायतमा हजारौंले ज्यान गुमाइसकेका छन् ।

नेपालमा पनि कोरोना संक्रमितको संख्या ४५ पुगेको छ । हालसम्म ७ जना निको भइसकेका छन्, भने बाँकी ३८ जना उपचाररत छन् ।